Kwena nicifye icitemwiko tabateenda
Pipi, nkabila ukukukambatila kwati ni nda
Amenso yandi, yalilwala mushongo
Mu kutamba imishishi yobe; ala yalintoba bongo-bongo.
Imishishi yobe cilola
Ndoleshamo inshiku pe, nshamonamo ulubola
Ndoleshamo lyonse, nomba cisaasa nshilaimona
Wisunguka, ne milomo yobe filyo nshilatomona.
Ciine-ciine niwe tandabube
Ine ndi cibengele, ndi kasabi muli Cimanabubwe
Naileeta kuli iwe, we uluka imishishi kwati moono
Naileeta ndi obe, pa nshikufye ishinoono.
Wileka nsokolole babenye
Pipi, weo Lesa apeele imishishi nga mwenye
Ndamona ifyo bambi bakushuluka nga lufwinyemba
Naati kankulumbanyepo mu Cibemba.
Mu ciine Pipi, iyi mitatakulo
Ala yobe, ndi ciwelewele, mfubila ne fisakulo
Filya usakwilako imishishi
Nga walintemwa njasuka, ilyo nshilaya ku nshinshi.
